បញ្ហាដ៏ធំបំផុតក្នុងការដឹកនាំក្រុមហ៊ុនដែលធ្វើឲ្យ Jack Ma ពិបាកដោះស្រាយ ដេកគិតទាំងយប់ថ្ងៃ

មហាសេដ្ឋីមានបំផុតរបស់អាស៊ី លោក Jack Ma  ស្ថាបនិកក្រុមហ៊ុន Alibaba ដែលជាក្រុមហ៊ុនទិញលក់ទំនិញអនឡាញដ៏ធំជាងគេនៅអាស៊ី ធ្លាប់មានប្រសាសន៍ថា៖ សម្រាប់លោកផ្ទាល់ មុននឹងអាចធ្វើឲ្យក្រុមហ៊ុនអាលីបាបា (Alibaba) ទទួលបានជោគជ័យដូចសព្វថ្ងៃនេះ លោកបានឆ្លងកាត់ការលំបាក និងបញ្ហាច្រើនរាប់មិនអស់ ហើយក្នុងចំណោមបញ្ហាទាំងនោះ មានបញ្ហាធំបំផុតមួយដែលធ្វើឲ្យលោកពិបាកចិត្ត ពិបាកដោះស្រាយ ដេកមិនលក់ដោយសារតែគិតពីដំណោះស្រាយលើបញ្ហានេះគ្រប់ពេល។​  ថ្លែងក្នុងកម្មវិធីវេទិកាសេដ្ឋកិច្ចពិភពលោក Jack Ma បានបង្ហើបប្រាប់ពីបញ្ហាដ៏លំបាកបំផុតមួយ ដែលធ្វើឲ្យលោកពិបាកនឹងដេកលក់ស្រួលណាស់ ប្រសិនបើលោកស្វែងរកដំណោះស្រាយមិនឃើញទេនោះ បញ្ហានោះគឺទាក់ទងទៅនឹងការគ្រប់គ្រងក្រុមការងារឲ្យមានប្រសិទ្ធិភាព ដើម្បីធានាបានថាសកម្មភាពការងារមានភាពល្អប្រសើរ និងស្របតាមការគ្រោងទុក។

មនុស្សដែលមានចក្ខុវិស័យវែងឆ្ងាយរូបនេះ បានមានប្រសាសន៍ថា៖ បញ្ហាដែលលោកយល់ថាលំបាកក្នុងការដឹកនាំ Alibaba ឲ្យទទួលបានជោគជ័យ មិនមែនបញ្ហាខ្វះដើមទុន ឫ មិនមានលុយគ្រប់គ្រាន់សម្រាប់ដំណើរការក្រុមហ៊ុននេះនោះទេ តែបញ្ហាបុគ្គលិកទៅវិញទេ ដែលធ្វើឲ្យលោកឈឺក្បាល និងពិបាកចិត្តជាប់ជានិច្ច ពិសេសបុគ្គលិកដែលមានសមត្ថភាព ទេពកោសល្យ និងចំណេះដឹងខ្ពស់។

លោកបន្តថា៖ នៅពេលដែលAlibaba បានលេចចេញជារូបរាងក្រុមហ៊ុនបានមួយរយៈ រឿងដែលលោកគិតខ្លាំងបំផុតនោះ គឺស្វែងរកអ្នកដែលមានសមត្ថភាព និងមានឆន្ទៈធ្វើការ ហើយបញ្ហាចម្បងគឺមនុស្សដែលមានសមត្ថភាពទាំងនោះ សុទ្ធសឹងតែមានសមត្ថភាព និងការយល់ឃើញខុសៗគ្នា និងពិបាកធ្វើការងារជាមួយអ្នកដទៃណាស់។

តែទោះជាវាលំបាកប៉ុណ្ណា ក្នុងនាមលោកជាមេដឹកនាំ តួនាទីដ៏សំខាន់របស់លោក គឺធ្វើឲ្យមនុស្សខ្លាំងទាំងនេះ អាចចុះសម្រុក និងធ្វើការងារជាមួយក្រុមការងារខ្លាំងៗផ្សេងទៀត ព្រោះលោកយល់ថា មានតែធ្វើបែបនេះទេ ទើបអាចធ្វើឲ្យក្រុមហ៊ុន Alibaba ក្លាយជាក្រុមហ៊ុនស្តង់ដា នាំមុខគេ និងមានភាពខ្លាំងខុសពីគេ។

Jack Ma បានផ្លាស់ប្តូរជោគវាសនាខ្លួនឯង និងភាពរីកចម្រើននៃសេដ្ឋកិច្ចចិនលើវិស័យអនឡាញ ដោយផ្តើមចេញពីការចាប់យកឱកាសដែលគ្មាននរណាម្នាក់យល់ថាវាជារឿងដែលអាចទៅរួច ដូចដែល Jack Ma ធ្លាប់បានមានប្រសាសន៍ថា “កាលពីលោកចាប់ផ្តើមអាលីបាបាដំបូង គ្រាន់តែធ្វើការបង្ហោះ (Upload) រូបមួយសន្លឹក ត្រូវចំណាយពេលដល់ទៅកន្លះថ្ងៃក៏មានដែរ។”

ការគិតខុសគេ ធ្វើរឿងដែលគ្មាននរណាហ៊ានធ្វើ និងមិនចង់ធ្វើដូចនេះហើយ ទើបធ្វើឲ្យ Jack Ma ដែលមនុស្សគ្រប់គ្នាហៅថា “មនុស្សឆ្កួត (Crazy Jack)” ក្លាយខ្ឡួនជាសេដ្ឋីដ៏មានឥទ្ធិពលមួយរូប៕